-Ari purhepecha wantari jarhuataati ts’ïmani warhiitiichani énkaksï wétanchaaka sési kurhankunt’ani mámaru jásï jarhuatakweechani, kwáp’ekweeri, p’ikwarhirakweeri, tsinap’ikweeri ka materu ampe.
Morelia Michoacán, 15 agosto 2024.Wékaparini sánteru sési jarhoani yámintu kw’iripuni, Juramukwa municipiorhu anapu énka orhets’ïkuni jaka Alfonso Martínez Alcázar, yáasï jarhuawaati warhiitiichani énkaksï wétarhinchajka éska kurhamukuakaksï p’urhepecha jimpo, arini jarhuap’ikwa jawati jimini Instituto de la Mujer Moreliana para la Igualdad Sustantiva (IMMUJERIS).
Ísï jánkwarhixati IMMUJERIS, sánteru sési marhuakuani warhiitiiichani enkaksï wétarhinchaaka sési kurhakunt’ani ts’ïmeeri wantakwani jimpo ísï éski kwáp’ekweeri (área jurídica), p’ikwarhirakweeri (psicología), tsinap’ikweeri ka jorhenkwarhikweeri ampe.
Arini ampeeri IMMUJERIS orhets’ïkuti Nuria Gabriela Hernández Abarca p’imarhiaxati warhitiichani énkaksï p’urhepecha wantajka éskaksï antaparhakweraaka ka exeni náki jarhuap’erakweechani úaksï marhuatani énka jimini warhiitiichani jarhuawajka.
“Arini p’urhepecha wantari jinkoni wékaxakaksï éska warhitiicha sánteru sési janhanharhinhaaka ka únksï kwáp’ikwarhini, tsinhakwarhini, eyakpekwarhini wantanhiateechani ka jorhenkwarhini ampe axu imani empe énka imeechani marhuakuaka” wantasti.
Warhiiticha p’urhepecha wantariicha úatiksï wantap’ani arini whatsApp jimpo: 7297380521 y 4438207049, jimaksïni sési kurhankuchiiati ka eyankunksïn na jatinksï erokani.
